बड़ो नगर बाढाण
दोहा
वरसाती लुणी वहै महिमा धर मालाण
नांमी मांणस नीपज्या बडोनगर बाढांंण–१
परचा धूहड् पाविया नंमो राय नागांण
कुलदैवी कंमधज री बडो नगर बाढांण”–२
रायपाल थूहंडृ रै प्रोल बारट थपांण
गांम बसायो ध्रंगुडों बडोनगर बाढांण–३
भगंत कवी भादरैस मै जनमै ईसर जांण
चारण अंजसै चोजसु बडोनगर बाढांण–४
कंचन तन चारण कियो पिठवा रो प्रमांंण
जको सेवांणै जैतसी बड़ो नगर बाढांण–५
दीपै चारण दैवियां जंमर घंणा जलांण
परचा सांप्रत पविया बड़ो नगर बाढांण–६
पगला धरिया पांडवा समियो तिरथ सुजांण
दरसण आवै दूनियां बड़ो नगर बाढांण–७
महिमा रूपां मालदै ज्यांरी भगती जांण
गुणियन दुरंगो वागजी बड़ो नगर बाढांण–८
चोखो मठ चोहंटंण सांमी डूंगर सिधांण
तारातरै धूंणी तपै बड़ो नगर बाढांण–९
आवै नावण अपसरा रूख गिर रलियांण
पाबू दैवल प्रागटै बड़ो नगर बाढांण–१०
नगर किराड़ू निरखियै जूंना मंन्दिर जांण
आयो भांणैज ऊघड़ो बड़ो नगर बाढांण–११
प्रगटै रांमा पीरजी अजमल रै घर आंण
मंन्दीर काशमैर मै बड़ो नगर बाढांण–१२
खेमो सिध नै खूबड़ मा अठै वांकल री आंण
नाकोड़ा भैरव नमो बड़ो नगर बाढाण–१३
धरती डुंगर धोरिया नदियां घणा नैवांण
समतल भुंमी सांमठी बड़ो नगर बाढा़ंण–१४
रूखं अरंणा रोहिड़ा जालां खैजड़ जांण
बावल कूंमट बोरड़ी बड़ो नगर बाढांण–१५
कैर नीबं कंकैड़ियां खीप चगां खुरसांण
दाड़म गूंदा दैखियै बड़ो नगर बाढांण–१६
गायां बकरी गाडरां सांढै ऊठ सुजांण
सखरै घोड़ै भैसियां बड़ो नगर बाढांण–१७
बड़िया गवार बाजरी जबरा काचर जांण
मीठा घण बोर मतिरा बड़ो नगर बाढांण–१८
रूड़ा गैऊ रायड़ो जीरो ईसब जांण
सरसो अरंडी सांतरा बड़ो नगर बाढांण–१९
कूवां तैलज नीकलै खरी कोयला खांण
निरमल तैर रिफानरी बड़ो नगर बाढांण–२०
अजां घंणी है ओपमा ओर घणा ऐहनांण
कवी रिड़मल कैहत है बड़ो नगर बाढांण–२१
रिड़मलदांन बारहठ भियाड़