महाशक्ति देवल जिन्होंने अपने पिता की जागीर का चौथा हिस्सा अपने पिता के सेवक जो कि बेघड़ जाति का मेघवाल था को देकर बनाया था जमींदार। आजादी के बाद, उस मेघवाल की संतति को मिला था जागीर का मुआवजा। आज भी पशिचमी राजस्थान के बेघड़, कागिया, पन्नू आदि उपशाखाओं की इनमें हैं अगाध आस्था
।।चित इलोऴ।।
इऴ माड़वै हिंगल़ाज आई, करण कवियां कार।
सदन भलियै घरै सगती, आप ले अवतार।
तो दातारजी दातार, देवी देवला दातार।।१
बापन देथो वर्यो वरधर, खारोड़ै जस खाट।
किरपा कर निज चरण कीधी, धरा पवित्र धाट
धिन धाटजी धिन धाट, धरती पवित्र धिन धाट।।२
अणदीठ गड़सी तणो आई, मेटियो महमाय।
जिकी बातां जगत जाहर, सुजस री सुरराय।
तो सुररायजी सुरराय, सेवी भीर में सुरराय।।३
दंडणी दुसटाण देवी, खंडणी खल़ खाग।
मंडणी निज दास माता, भला करनै भाग।
तो भल भागजी भल भाग, भूमि भाणवां भल भाग।।४
कोप सिरहर विरम कोपी, अवन दी उथ्थाऴ।
अमराण री इऴ आप आपी, वीसै नै विरदाऴ।
तो विरदाऴजी विरदाऴ, बाई देवला विरदाऴ।।५
अखेसर री पाऴ ऊपर, जुड़ै नवलख जुत्थ।
ऊतरै आकाश आई, सजण रामत सत्थ ।
तो समरत्थजी समरत्थ, साची देवला समरत्थ।। ६
मही पावन पेख मगरो, दुनी जस गल्ल दाख।
तोरण थंभा नवै तणिया, साच रीति साख।
तो नवलाखजी नवलाख, निमतै ऊमड़ै नवलाख।।७
मनरंगथऴ सूं मामड़ा सधु, सबऴ बैनां सात।
अणंद आपण ऊतरी इत, भेऴ मेहरख भ्रात।
तो भल भ्रातजी भल भ्रात, भगनी संग मे भल भ्रात।।८
कामेही नागल नमो करनल, सैणला सुखदात।
बूट बल्लर बैचरा वऴ, बिरवड़ी बडहाथ।
बड हाथजी बडहाथ, विदगां पाऴणी बडहाथ।।९
चांपला मालण वहा चंडी, सगत गीगल साथ।
झूऴ सगत्यां महा जोगण, खूबड़ी विखियात।
तो विखियातजी विखियात, बांकल रूप मे विखियात।।१०
होकबा हलकार हुईया, भिऴी कर भलकार।
नमकारतो भट भैर नमियो, करी नै किलकार।
तो किलकारजी किलकार, करनै भैरवो किलकार।।११
कोटवाऴ काशी करै कीरत, डम्मरू डमकार।
निरतकार आगऴ तोर नाचै, खेतलो खमकार।
तो खमकारजी खमकार, खमियो खेतलो खमकार।।१२
धूजियै धमकार धरती, गूंजियै गयणांग।
पनंगपत पड़ पूजियै पग, आय करियो आघ।
तो नम नागजी नम नाग, नमियो आयनै पत नाग।।१३
तणणाट रमियै ताकड़ी तण, झांझरां झणणाट।
वाव संग बणणाट वजियै, गूघरां गणणाट।
तो गणणाटजी गणणाट, गूघर गूंजिया गणणाट।।१४
चंडका बियै रूप चंदू, धरा राखी धिन्न।
गीधियै कवि गीत कथियो, मात अरजी मन्न।
तो तूं मन्नजी तूं मन्न, माता देवला तूं मन्न।।१५
गिरधरदान रतनू “दासोड़ी”